Era Harga Palau de Ripòlh siguec fondada coma harga de hèr en sègle XVII e mantenguec era sua activitat pendent cinc sègles enquia que barrèc er an 1978. Se tròbe laguens d’un bastiment d’estatges que servien e servissen d’abitatges. Er embaish ei ocupat pera harga, damb es trompes d’aigua, es martinets, era carboèra, eth horn e era harga. Separat der obrador se tròbe era arròda idraulica, era paishèra e era bassa que servie tà emmagazinar era aigua der arriu Freser, hèr a mòir era arròda e generar eth vent que, impulsat de manèra contínua, da nòm ath metòde dera harga catalana. Ath delà d’èster era unica harga de Catalonha e dilhèu d’Espanha qu’encara elaboraue pèces de aram enquiara dusau mitat deth sègle XX, era caracteristica mès singulara dera Harga palau son es dus martinets installadi, damb coishinets metallics, mange de om e malh d’acèr.

Un o dus còps ath mes s’alugaue eth horn e se honie eth metau, que ère herralha de coeire. De cada colada o hornada se hargaven ath ròi es pèces honudes, que posteriorament se rescauhauen ena harga entà èster ductiles e damb es malhs se tustauen es pèces entà que auessen era forma desirada. En cas de fabricar un peiròu gran, èren de besonh vint operacions de rescaufar, refrescar ara aigua e marterejar.

Eth 1997, eth Musèu dera Sciéncia e dera Tecnica de Catalonha aquerís a Pere Palau er embaish qu’aucupe era harga, eth quau s’intègre laguens deth Sistèma Territoriau deth Musèu dera Sciéncia e dera Tecnica de Catalonha.

Actuaument s’a restaurat e se pòden visitar e conéisher milhor es installacions e eth sòn foncionament.