Er Ecomusèu Çò de Joanchiquet de Vilamòs daurís es pòrtes en 1996. Se tracte d’ua casa tradicionau aranesa, coneishuda coma auviatge o còto, a on un pati barrat articule es diferenti espacis: casa familhau, estables, vergèr, uart, eca.

Eth prumèr proprietari coneishut siguec Joan Aunòs, que i demorèc ena dusau mitat deth sègle XVI. Es Aunòs demorèren era casa sense interrupcion pendent dètz generacions, enquias ans seishanta deth sègle XX. Èren ua familha de pagesi arrics que gaudiren d’ua posicion sociau e politica preeminenta ena comunitat aranesa. Quauqui uns des sòns membres arribèren a èster sindics e conselhèrs deth Conselh Generau d’Aran, enes sègles XVII e XVIII.

En sègle XVIII, era anciana residéncia familhau s’agranís damb ua naua bastissa de dus estatges e tet, e un sègle dempús, en XIX, s’i hèn reformes parciaus.

Entre es sègles XVIII e XIX se bastissen es estables.