Eth monastèri de Sant Esteve, fondat er an 812, ei un des monestèris benedictins mès ancians de Catalonha e ei era origina dera ciutat de Banyoles. Siguec bastit ath dessús d’un ancian temple tardoroman, deth quau encara se’n consèrven vestigis en sossolèr. Era prumèra referéncia documentau coneishuda ei un diplòma deth rei Loís eth Pietós der an 822, que autrejaue immunitat ath monastèri e li confirmaue era proprietat der estanh e des sues aigües.

Ath long dera edat mejana e era epòca modèrna, eth conjunt patic nombroses destruccions que provoquèren que se rebastisse e reformèsse en diuèrses escadences. Per aguest motiu er aspècte actuau deth monastèri respon majoritàriament a un estil neoclassic (sègle XVIII). Es darrèri monges benedictins deth monastèri serien definitiuament exclaustradi en causa dera desamortizacion deth 1835.

Deth conjunt, destaque era glèisa, de nau centrau damb tres absides, eth campanau coronat per un cupulin e eth magnific clastre de dus nivèus.