Era enguarda de quinsevolh musèu arqueologic s'adrece de cap ath passat. Mès non pas entà demorar, senon entà installar-lo en present e entà hèr deth document arqueologic un instrument ath servici dera societat actuau. Entà que sigue atau, cau explorar naui territòris e traçar naui camins en tot cercar formules que faciliten un encaish seren entre passat e present.
Des dera sua fondacion, Tarraco auec un ròtle important en procès d'incorporacion des tèrres dera peninsula Iberica a ua naua forma de vida e d'organizacion sociau. Per Tarraco, basa militara, penetrèren en Ispània es legions qu'auien d'assegurar era conquista e pacificacion deth territòri. Per Tarraco entrèren, tanben, toti es components culturaus que, pòc a pòc, assimilèren as pobladors indigènes —es ibèrs—, que lèu esdevengueren membres dera grana comunitat latina.
En sòn urbanisme, ena sua arquitectura oficiau o domestica, enes elements de quotidiana preséncia ciutadana, Tarraco se constituïc en fidèu exposant d'ua cultura entre impausada e celebrada. Un exposant que fòrça sègles mès tard contunhe en tot aufrir-mos es sues claus de comprension, parciaus, mès tostemp significatives. Ua istòria que balhe ath patrimòni classic era oportunitat de contunhar en tot generar emocions e coneishement ena actualitat.
