Arqueològ en tot trabalhar ena catacion ena Draga. Fotografia de Arqueoxarxa, Josep Casanova.
Eth jadiment arqueologic dera Draga ei un des assetaments d’agricultors e pagesi deth nòrd-èst dera peninsula Iberica mès ancians e se tròbe ena part centrau dera vòra orientau der estanh de Banyoles.
Actuaument es trabalhs, les amien a tèrme eth Musèu Arqueologic Comarcau de Banyoles (MACB), eth Conselh Superior d’Investigacions Scientifiques (CSIC), era Universitat Autonòma de Barcelona (UAB), eth Musèu Arqueologic de Catalonha (MAC) e eth Centre de Arqueologia Subaquatica de Catalonha (CASC).
Eth poblat, pendent era ocupacion neolitica, auie era forma d’ua peninsula que s’endintraue cap ath lac, damb un arribent doç e contunhat. A compdar des prospeccions, se supause qu’auie ua estenduda aproximada d’apruprètz 8.000 m².
Era situacion en ua zòna damb umiditat permanenta, actuaument corbida de manèra parciau pes aigües deth lac e pes sediments, a propiciat ua extraordinària conservacion des rèstes organiques sus materiaus vegetaus, a compdar des rèstes des cabanes enquias utisi realizadi en materiaus vegetaus coma arcs, hauç, manges de aishes, còrdes, recipients de husta, paus cavadors, culhèrs gròssi e paèrs, entre de auti. Aguest hèt hè qu’era Draga sigue un des jadiments principaus entà estudiar eth neolitic en Euròpa.
