Eth Salon d’Aur

Eth 18 d’octobre de 1915, quate ans dempús dera inauguracion dera Sala Gotica deth Maricel de Tèrra, s’inauguraue eth gran salon de hèstes, coneishut coma Salon d’Aur pera sua exuberanta decoracion.

Era decoracion neobarròca d’aguestes sales siguec a cargue deth hustèr Joan Marsal. Eth madeish Utrillo didie que Marsal comprenie perfèctament que non auie de copiar, que li calie hèr ua òbra laguens dera inspiracion des estils escuelhudi.

En moment dera inauguracion, dera decoracion deth Salon ne poderíem destacar un riquissim frontau toledan, era bandèra deth Grèmi de Herrèrs e Sarralhèrs de Barcelona, eth gran larèr procedent de Jaca, retaules gotics, òbres ara chinesa, etc.

Aué en dia, un còp dehòra dera colleccion de Deering, se pòden contemplar d’autes òbres d’art, fòrça des quaus son reproduccions. Eth David de Donatello, fragments des mosaïcs bizantins de Ravena que representen er emperaire Justinian e era sua esposa Teodòra, totes còpies de grana qualitat artistica.

D’un aute costat, eth mobiliari, a diferéncia des còpies artistiques, son versions fòrça liures que pòden èster mès eth resultat dera imaginacion e eth gost des sòns creadors que non pas dera còpia arqueologica pròpriament. I podem trobar un cadirat de còr, lauamans, escritòris, taules, etc.