Era ceramica a estat, e ei encara, era activitat mès emblematica dera Bisbal d’Empordà. Ath sòn torn s’a configurat un des principaus motors economics dera vila qu’a dat trabalh (e encara ne da) a un percentatge important dera poblacion locau. Aguesta activitat a ua tradicion de diuèrsi sègles ath sòn darrèr; era prumèra notícia documentada, que da rason der ofici de terrissèr ena Bisbal, se tròbe en un capbrèu de 1511. Des dera sua origina, aguest ofici a anat creant un important patrimòni materiau en decors des ans.

Eth musèu a coma finalitat era preservacion, era conservacion e era difusion d’aguest patrimòni materiau e culturau vinculat ara ceramica bisbalenca, atau com vertebrar ua proposicion d'interpretacion deth sistèma socioeconomic generat per aguesta indústria; un modèl sociau qu’istoricament a comportat ues pautes sociaus e culturaus especifiques. Tanben se vò dar a conéisher eth procès d'industrializacion particular que i a agut laguens d’aguest encastre. Ei en aguest sens, qu’eth Terracota Museu represente tara indústria ceramica dera Bisbal d'Empordà e des comarques gironines un emblèma sectoriau de prumèr orde; sense dubte eth musèu ei, en aguesti moments, er projècte culturau de mès projeccion dera vila.