Eth Musèu Avescau de Vic (MEV), inaugurat er an 1891, ei plaçat en un bastiment contemporanèu en centre istoric de Vic. Acuelh ua des milhores colleccions d’art medievau d’Euròpa, damb caps d’òbra de pintura e escultura deth romanic e gotic catalan. Es colleccions d’orfebraria, teishut, harga, veire e ceramica aufrissen un recorrut complèt pera istòria der art liturgic e es arts decoratius en Catalonha. S’i expausen mès de 29.000 pèces.

Es sales deth romanic e deth gotic acuelhen es òbres mès estimades e qu’an projectat eth Musèu Avescau ath delà des nòstes frontères. D’epòca romanica destaquen eth devarament d’Erill la Vall, eth baldaquin dera Val de Ribes e un important conjunt d’antependiums. Dera colleccion deth gotic subergessen era mairdediu de Boixadors, eth retaule de Bernat Saulet e es òbres des milhors pintors catalans d’aguest periòde, coma Lluís Borrassà, Bernat Martorell o Jaume Huguet.