Eth Museu del Cinema siguec inaugurat eth 8 d’abriu de 1998 en un edifici deth centre dera vila de Girona.

Era visita ara exposicion permanenta permet hèr un viatge a trauès de 400 ans d'istòria dera imatge en moviment e conéisher quini son es antecedents deth cinema coma tecnica e coma espectacle visuau, e com sigueren es inicis deth setau art enquiara arribada dera television. Tanben mòstre es arraïcs dera nòsta cultura visuau, tan important e tan present ena nòsta realitat actual. Era interactivitat deth montatge dera exposicion permanenta e era vintea d'audiovisuaus que i a garantissen qu’era visita sigue recomanabla entà public de totes es edats.

Era Colleccion Tomàs Mallol d’objèctes cinematografics e pre-cinematografics ei era basa dera exposicion permanenta. Remassada durant mès de trenta ans per Tomàs Mallol e aquerida per Ajuntament de Girona en 1994, ei ua des colleccions mès importantes a nivèu mondiau en sòn genre.