Eth musèu acuelh es dues granes colleccions centenàries dera vila de Lhèida: era arqueologica, procedenta der Institut d’Estudis Ilerdencs e ereua der antic Museu d’Antiguitats, creat en 1868; e era artistica, qu’auie conformat er antic Museu Diocesà de Lleida, fondat en 1893. Ath delà, aué eth musèu intègre eth hons aportat peth capítol dera catedrau de Lhèida, atau com quauque depòsit dera Generalitat de Catalunya, eth Museu Nacional d’Art de Catalunya, eth Museu d’Arqueologia de Catalunya e de quauqui particulars.

Era exposicion permanenta amasse lèu mil objèctes que permeten un recorrut pera istòria e eth patrimòni d’un ample territòri qu’a era vila de Lhèida coma capitala naturau. Er objectiu fondamentau deth musèu ei auferir servici ath territòri de procedéncia des colleccions, eth dera antica diocèsi lheidatana e eth dera region istorica deth pla de Lhèida, damb vocacion d’èster un centre de promocion e metuda en valor des fenomèns patrimoniaus d’aguest encastre territoriau d’actuacion.