Enes darrèri dus cents ans, Sabadell s’a hèt a conéisher coma ua des ciutats catalanes damb mès identitat artistica, tant per çò qu’ei dera qualitat coma dera quantitat des sues produccions. Ath long dera istòria a participat d’ua manèra contunhada enes movements artistics generaus e soent les a protagonizadi.

Era colleccion deth Musèu d’Art de Sabadell (MAS) ei ua des mès representatives deth país, mercés ath compromís qu’a damb era ciutat. Aguest compromís a generat confidança e ua estreta collaboracion entre eth musèu e es diferenti agents sociaus, coma entitats, artistes e colleccionaires; toti an contribuït, damb era sua volontat e era sua generositat, a bastir era colleccion qu’aué auem.

Eth MAS trabalhe damb era istòria der art locau dempús deth sègle XIX enquiara actualitat. Dispause de mès de 13.000 objèctes entre diboishi, pintures, arts grafiques, arts decoratives e mobiliari, ceramiques, veires e metaus, fotografies, escultures e auti objèctes.