Era Fondacion Stämpfli amasse ua des colleccions d’art contemporanèu mès importantes de Catalonha. Impulsada peth matrimòni Pere e Anna Maria Stämpfli, era Fondacion exibís enes sues installacions, plaçades ena plaça der Ajuntament de Sitges, ua seleccion deth sòn hons, constituït per 90 òbres de 60 artistes de 22 nacionalitats.

Era Fondacion Stämpfli neishec er an 2006 entà canalizar eth projècte deth matrimòni Stämpfli de dotar Sitges d’un centre d’art contemporanèu qu’amassèsse òbres d’artistes significatius deth panorama internacionau. Totes es òbres qu’intègren era colleccion an estat donacion des pròpri artistes, es sòns descendents o galaristes de relèu, e globaument configuren un còrpus singular der art contemporanèu des darrèri cinquanta ans.

Er an 2011, era Fondacion inaugurèc es sues installacions, que dispausen de tres sales a on s’exibís ua seleccion deth sòn hons. En aguesti prumèrs ans de foncionament, era Fondacion a programat tanben exposicions monografiques cada sies mesi.

Pere Stämpfli ei un artista coneishut, avalorat e cotizat especiaument en França, Soïssa, Belgica e es Estats Units. Era sua òbra hè part des colleccions publiques e privades mès destacades d’Euròpa, es Estats Units, Japon o Corèa. A presentat ua seishantea d’exposicions individuaus —entre es quaus eth Centre Pompidou e era Galaria Nacionau Jeu de Paume de París— e apruprètz 230 de collectives ath long dera sua dilatada trajectòria.