Era antica farmàcia der espitau de Santa Caterina se considère un des mès notables ensems farmaceutics conservadi in situ deth sègle XVIII. Era estança ei corbida per ua vòuta d'arèsta decorada damb pintures allegoriques deth sègle XIX, que corbissen ues pintures mès antiques d'epòca barròca damb allegories galeniques.

Deth mobiliari conservat destaque eth cordialer, er armari a on se sauvauen es medicaments mès presadi, incorporat en ensem d'estatgères. Era farmàcia consèrve ua colleccion de mès de 300 pòts de ceramica blanca vitrificada datadi des sègles XVII e XVIII, ath delà de diuèrsi mortèrs, flascons de veir bohat e recipients de husta, entre d'auti. Aguest ensems de pòts de ceramica ei un des mès importanti d'Euròpa pera sua cronologia e pera quantitat de recipients que la formen. Ua auta des jòies d'aguesta farmàcia ei era bibliotèca, que recuelh diuèrses publicacions e tractats restacadi damb era medecina, que van deth sègle XIII enquiath XX.