Cercaire de musèus e localitats

Musèu Romantic Can Llopis

Sitges

Façana deth Musèu Romantic

Façana deth Musèu Romantic

Eth Musèu Romantic Can Llopis se tròbe actuaument barrat per reformes.

Intimitat e vida sociau en romanticisme. Eth romanticisme representèc era apoteòsi der individú en toti es encastres dera activitat umana. Tanben en encastre dera arquitectura e dera decoracion d’interiors. Es òmes e es hemnes volien hèr evidenta era sua personalitat, eth sòn gost. A trauès d’objèctes e mòbles de diferentes procedéncies e estils, amassadi armonicament, er abitatge mòstre coma èren, o coma volien èster, es persones que i viuien. En ua casa romantica, cada cornèr amague un secrèt, cada objècte sauve eth rebrembe d’un instant de vida. A partir d’aguestes traces podem reconstruïr e compréner eth passat.

Eth Musèu Romantic Can Llopis. Aguesta casa deth sègle XIX, perfèctament conservada, permet que mos apropem as formes de vida d’ua familha de proprietaris catalans que viuec era sua esplendor pendent es ans deth romanticisme. Siguec construïda ara fin deth sègle XVIII, en estil neoclassic, de formes sòbries e elegantes, damb fòrça pòca ornamentacion. Fidèu ara tradicion mediterranèa, era casa consèrve eth pati centrau per a on puge era escala principau qu’amie ar estatge nòble. Era decoracion der interior rebat era evolucion deth gost a compdar dera epòca dera construccion der edifici, fòrtament influït pes estils aristocratics, enquiath trionf des naues formes deth romanticisme borgés.

Eth progrés tecnic. Ena casa se pòden veir bèri auanci tecnics deth sègle XIX: ua veitura de shivaus damb capacitat tà catorze persones e diuèrsi velocipèdes (un des quaus ei fòrça sofisticat, damb jantes de goma e pedales). A trauès des diuèrses sales, se pòt resseguir tanben era evolucion dera illuminacion, des des candelèrs e es aranhes damb candeles de cera enquiar enlumenat de gas.

Es Llopis. D’origina marinèra, era familha Llopis se junhec ena mitat sègle XVIII damb ua familha de proprietaris ruraus: es Falç. Es Llopis se dediquèren as proprietats familhaus e ath cultiu des vinhes. En cerèr dera casa s’elaboraue era Malvasia Llopis, que s’exportèc tà diuèrsi païsi d’America. Eth darrèr membre deth linhatge, Manuel Llopis i de Casades, cedic era casa pairau ara Generalitat de Catalonha eth 1935.

Eth Musèu Romantic s’inaugurèc eth 1949. A estat agranit successivament damb ua seria de diorames, qu’illustren diferenti episòdis dera vida en sègle passat e des tradicions populares catalanes, e damb era colleccion de pipes dera artista Lola Anglada, qu’amasse mès de quate centes pèces de diferenti païsi, fòrça des quaus son deth periòde romantic.

INFORMACION

ADREÇA
TELEFÒN
WEB
http://museusdesitges.cat/ca
ORARIS
COM ARRIBAR-I
ADREÇA ELECTRONICA
museusdesitges@diba.cat

MAPA

scroll to top icon