Era exposicion permanenta "Era fabrica textila" mòstre tot eth procès de fabricacion des teishuts de lan en contèxte originau d'ua fabrica de principis deth sègle XX, damb ua prepausa museografica modèrna e evocadora. Era exposicion aucupe ua superfícia totau de 2.200 m² damb es espacis energetics en sosterranhs, era sala dera maquina de vapor e era nau de produccion der antic Vapor Aymerich, Amat i Jover.
Eth recorrut s'inície en antic sosterranh dera fabrica, a on se consèrven es carbonères, es caudères, era humenèja e era maquina de vapor, qu'ère eth còr dera fabrica. Ara seguida, er accès tara nau permet de conéisher e observar es diferenti moments deth procès de produccion, des deth premaniment dera lan entà hilar, eth hilatge, era teishedura, es tints e es acabats, e eth magazèm.
Ath long deth recorrut eth visitaire pòt gaudir d'ua colleccion de maquinària textila excepcionau e unica en Catalonha, autant pera sua qualitat tecnica coma peth sòn estat de conservacion. Era exposicion recree er ambient dera fabrica, eth tapatge e es movements dera maquina de vapor, eth foncionament des maquines de hilar e des telèrs, era vida vidanta des trabalhadors e es tensions sociaus que desboquèren ena formacion deth movement obrèr.
