Eth naucentisme ei eth nòm qu’eth joen e ambiciós assagista Eugeni d’Ors s’inventèc entà dar nòm a un encara inconcrèt nau movement culturau catalan, qu’evidentament auie tanben era sua faceta enes arts plastiques.
Ath començament, D’Ors nomentaue naucentistes toti es que representauen era sua manèra de veir er art deth nau sègle, er acabat d’estrear nau cents. Lèu, totun, era crida plan concrèta que Joaquim Torres Garcia hec entà qu’es naui artistes catalans guardèssen de cap ara Mediterranèa en lòc de mirallhar-se ena Euròpa deth Nòrd, e era mòrt eth 1911 deth cap dera naua pintura, Isidre Nonell —er art deth quau non auie gran causa de mediterranèu—, orientèc definitivament eth naucentisme de cap a ua recèrca des arraïtzes grègues, latines e reneishentistes italianes, recreades totun damb un estil diferent, non pas calcat deth classic.