Centre d'interpretacion que presente eth mon dera mòrt en epòca romana e era problematica funerària de Tarraco. Acuelh tanben es pèces mès relevantes recuperades pendent es trabalhs d'excavacion.
S'i analise se com siguec eth sòn descorbiment en 1923 e era recèrca que s'amièc a tèrme entà recuperar eth recinte, damb un aumenatge especiau a Mn. Joan Serra i Vilaró, anma dera recèrca e dera posteriora consolidacion der endret coma espaci museïstic e visitable.
S'i expòse, ath delà, era problematica funerària en Tarraco, es diferentes sòrtes d'enterraments documentades pendent es excavacions e es escultures funeràries qu'adornauen es sepulcres. Tanben se presente ara poblacion que viuec en Tarraco pendent es diferenti sègles que foncionèc era necropòli, es ofrendes que se deposauen enes tombes e es rituaus funeraris, era simbologia cristiana e eth prumèr cristianisme en Tarraco, relacionat damb es figures de Fructuós, bisbe de Tarraco, e es sòns diaques Auguri e Eulògi, cremadi ena arena der anfiteatre. Es sues despolhes sigueren recuelhudes e —versemblablament— deposades en airau dera necropòli paleocristiana, a on, a inicis deth sègle V, se quilhèc ua basilica dedicada ara sua memòria.