Societat presenta: veirines deth futur

Eth Musèu Etnografic de Ripòlh recuelh part deth legat materiau de diferentes generacions que mos an precedit. Aguestes colleccions mos parlen de coma es ripolhesi se guanhauen era vida, coma viuien laguens des cases, coma minjauen, coma vestien e coma se mudaven es dies de hèsta. Des sues credences e dera manèra que auien de distrèir-se. E tanben des mestièrs que generauen toti aguesti objèctes, que ja apertien ath passat. Aué es estudiosi des comportaments sociaus diden qu’èm immergidi en ua cultura materialista. Que jamès non auíem acumulat tanti objèctes ath torn nòste. Que jamès cap societat auie consumit tanta matèria entà satisfèr es sòns besonhs…, o desirs.

Es catalans, coma tanta de auta gent ena planeta, cambiam de casa e de trabalh damb ua frequéncia abans impensabla. Mès quasi jamès non auem temps de guardar de naut en baish es causes qu’afistonen eth nòste païsatge domestic, sociau o laborau. Dilhèu en transcors d’ua d’aguestes mudances se produsís un parentèsi ena relacion inconscienta entre nosati e es causes qu’auem. E atau observam es nòsti objèctes jos ues naues lutzes.