Començat eth mes de gèr arribaue eth moment dera tuada deth pòrc. De bon maitin, dempús d’esdejoar e d’auer begut eth veire de barreja (aiguardent e vin), er aucidor esgargameraue er animau. Era buderaira recuelhie era sang en un pairòu e se procedie a sorrostir-lo sus eth banc damb huec d’argelat o ben s’escaudaue damb aigua hèta a borir. Un còp pelat, li trègen es budèths e li talhauen es pès, abans de pesar-lo damb era romana. Era buderaira ruscaue es budèths e demorauen prèsti tà embotir es saussisses e es langoïsses. Conservadi damb fòrça sau, es camalhons e era carnsalada acompanharien fòrça repèishi ath long der an.