Er art gotic catalan conservat en MEV includís òbres màgers de cada ua des sues etapes.
Era pintura gotica des sègles XIV e XV i ei fòrça ben representada: dempús des inicis deth gotic liniar de començaments deth sègle XIV, en tot passar per estil italogotic de mitat deth sègle XIV, enquiath gotic internacionau deth sègle XV. Eth linearisme d’influéncia francesa ei manifèst enes taules de Soriguerola. Eth corrent italianizant, a compdar deth 1330, se hè evident enes òbres pictoriques restacades as Bassa. E deth prumèr gotic internacionau destaquen es òbres de Jaume Cabrera o Joan Mates, e sustot es magnifics retaules deth convent de Santa Clara, de Lluís Borrassà, e de Guimerà, de Ramon de Mur (es milhors pintors catalans dera epòca), expausadi en un espaci que hè a brembar eth pati d’un bastiment gotic.
Per çò qu’ei dera escultura gotica deth sègle XIV, s’i pòden veir imatges de crists e mairdedius en husta, pèira e alabastre. Cau destacar eth retaule d’alabastre de Sant Joan de les Abadesses de Bernat Saulet; era mairdediu de Boixadors, un des cap d’òbra dera escultura gotica catalana d’aguesta epòca, e d’autes que se pòden restacar a autors de nauta qualitat, coma Pere Oller.