Sala d’Arqueologia deth Musèu Avescau de Vic
Era origina e era istòria deth MEV van relacionades damb arqueologia comprenuda coma activitat culturau; prumèr, damb un afan colleccionaire e damb un interès mès estetic qu’istoric, mès dempús coma airina entà conéisher milhor eth passat.
Era arqueologia s’ordene cronologicament en un circuit parallèl entà comparar es ancianes colleccions d’art egipcian, grèc e roman, damb era arqueologia ausetana. S’i exibissen tanben exemplars deth monetari d’epòca grèga e romana, e òbres en pèira de gran format d’epòca iberica e romana, plaçades abans en lapidari.
Eth lapidari s’expause cronologicament: romanic, gotic, Reneishença e barròc. I a pèires d’autar, labades sepulcraus e notables exemples d’epigrafia. Ne subergessen es capitèths, que mòstren era evolucion qu’experimenten entre romanic e gotic; tanben cau destacar es pèces e es fragments procedenti dera desapareishuda catedrau romanica de Vic, coma era reconstruccion des fondaments dera portada deth sègle XII, recuperada peth Dr. Eduard Junyent.
Eth gran hiestrau deth vestibul deth nau bastiment permet enguardar eth campanau deth 1038 dera anciana catedrau. Per açò s’i a installat ua seleccion des relèus e des elements esculturaus romanics mès representatius d’aguesta catedrau, amassa damb es rèstes dera portada romanica dera glèisa de Sant Vicenç de Malla.
