Era Val d´Aran a patit, a causa dera sua situacion geoestrategica, nombroses temptatives d’invasion e annexion. Entà hèr front ad aguestes invasions e garantir-ne era defensa, Aran se dotèc d'un important hilat de fortificacions, des quaus aué sonque ne queden es roeines.
Es castèths de Les, Bossòst e Sentèths defenien, des der acabament deth sègle XII, era entrada peth nòrd. En 1283 es francesi bastiren tanben era imponenta fortalesa de Castèth Leon, enes Bòrdes, qu’enquia principis deth sègle XVIII serie era defensa militara mès importanta d’Aran.
D’autes nombroses òbres de fortificacion se documenten, en diferenti endrets dera val, entre es sègles XIV e XVI. Ne podem destacar es castèths o glèises fortificades de Vielha, Salardú, Arties e Vilac, damb es sues clausons emmuralhades, e provedides de tors de defensa ath long deth sòn perimètre, des quaus aué en dia practicament non ne quede arren. Tanben cau remercar era fortificacion des cases des famílies mès poderoses dera comarca, qu’èren dotades d’arquières e tors de defensa.