En tot profitar era nautor deth tet, sus es tirants, trobam un petit humaralet qu'ère profitat coma magasèm.
Eth hilatge dera lan, un còp cardada e elaborada era mèca, ère eth procès que daue forma ath hiu per, fin finau, elaborar damb eth es madèishes que s’emportarie eth client. Ena fabrica dera Lan, aqueth procès se realizaue en espaci plaçat en dusau estatge, en humarau dera bastissa.
Ací compartien lòc tres maquines: era mule-jenny, eth torcedor e era maquina de hèr madèishes.
En cas dera mule-jenny, aguesta maquina s'auec d’adaptar ar insufisenta espaci dera fabrica. Atau, calec redusir eth nombre de husèths originaus dera maquina.
En çò que tanh ara dera gamma de colors des madèishes, variaue en foncion dera color dera lan: blanc, marron o nere. Eth marron se coneishie coma burèu e ère fòrça avalorat pr'amor que, en barrejar-se damb eth blanc, permetie ua variada gamma de tonalitats. Eth nere s’utilizaue entara ròba de dòl oficiau, e per aguesta rason se conservaue un petit nombre d’oelhes neres, maugrat que se consideraue ua color de malastre.
Tota era maquinària dera Fabrica dera Lan se correspon damb prototipes realizadi a mitat deth sègle XIX en França.
