Eth petit talhèr de sarralharia, plaçat en aguest estatge, permetie d'apraiar era maquinària dera fabrica.
Enquiara arribada des fabriques dera lan en l’Aran (n’existien dues ena fin deth sègle XIX), eth procès de transformacion dera lan en madèisha se hège enes cases. Se tractaue d’un trabalh de hemnes, que cardauen e hilauen era lan tot en tot profitar es longues ores ath cant deth huec, sustot pendent er iuèrn.
Aquera petita indústria dera lan supausèc un aleugeriment des trabalhs domestics. Es vesins deth parçan portauen era sua lan, neta e shuta, ena fabrica. Ací se transformaue en madèishes, damb es qu'es mestresses podien tricotar ròba o d'autes pèces de lan de besonh entàs membres dera sua familha.
Prumèraments, un còp era lan ère ena fabrica, se pesaue en ua balança romana. Alavetz, segons era quantitat de lan e es caracteristiques qu'auie d'auer eth hiu, e en foncion des besonhs deth client, s’establie eth nombre finau de madèishes e eth prètz peth trabalh hèt. A compdar d’ací, començaue era prumèra part deth procediment de transformacion, eth cardatge dera lan. Consistie en un procès de pientat dera lan entà des·hèr-ne es nuds, e dempús s'arribaue a l’elaboracion dera mèca.
