Soent eth mainatge assimile eth mon der adult damb joguets coma es que podem trobar en musèu. Fotografia de MJC.
En musèu s’expausen ua seria de joguets que poderíem definir coma simbolics, ei a díder, aqueri que permeten ath mainatge imitar eth mon der adult a trauès dera representacion mentau de ròtles sociaus e objèctes fictius que reprodusissen era realitat, de forma mès o mens fidèla segons era epòca. A trauès deth jòc e deth joguet, eth mainatge assimile ua grana quantitat d’informacion referenta ara vida der adult.
En aguest encastre i trobam joguets religiosi coma glèises, autars damb es elements que li dan sens, figuretes que compausen professons e diuèrses casubles. A començament deth sègle XX en Catalonha ère abituau qu’es mainatges joguèssen a hèr de caperans, tau coma se pòt verificar damb es diuèrses fotografies qu’acompanhen es pèces. Mainatges e mainades jogauen a batiar es pipòts, a celebrar missa o a portar eth viatic. Damb era proclamacion dera Republica er an 1931, aguest jòc desapareishec.
En aguest encastre tanben se pòden veir pipes de diferentes epòques e materiaus, a compdar de"pepes", es tipiques catalanes hètes de carton, enquias pipes de cera, porcelana e feutre, atau coma era prumèra Barbie, ja de plastic, que date de 1959. Tradicionaument era pipa a complit era foncion sociau de premanir es mainades entath ròtle que les ère assignat ja de ben petites: eth suenh des hilhs e dera casa. Eth mon domestic tanben se ve representat damb es codinetes, es jòcs de te, eth minjar en miniatura des cases de pipes e airines coma hèrs de lisar e maquines de cóser.
