Palai abandonat

Santiago Rusiñol emprenec eth sòn tresau viatge en Granada en deseme deth 1897, acompanhat de Genís Muntaner —eth sòn òme de confiança en Sitges que, en abséncia sua, auie suenh deth Cau Ferrat— e deth pintor e bon amic Ramon Pichot. Eth resultat finau siguec ua quarantea de teles damb es jardins granadins —e fòrça especiaument es deth Generalife— coma grani protagonistes.

Entre es quadres que se resistic a véner, n’i auie cinc pes quaus sentie particulara predileccion. Era pròva ei que dus d’aguesti quadres son penjadi actuaument en Cau Ferrat: un ei aguest e er aute ei Interior deth Palai de Víznar, ena Sala deth sorgent. Es cinc les pintèc entre hereuèr e març de 1898 en Víznar, un poblet des environs de Granada. Toti auien coma unic scenari eth Palacio de Cusco, ua anciana mansion episcopau bastida a finaus deth sègle XVIII. En veir er ostalàs e er espaciós jardin que l’entornejaue, er artista demorèc estonat pera extraordinària sensacion de solitud e abandon que transmetie er endret, era madeisha sensacion qu’aué experimentam en veir era òbra.

Es males èrbes entre es boishi, er estanhòu sense aigua, es esgrafits miei escafadi, es hièstres trincades… Toti es detalhs conviden ara malenconia e mos parlen der inevitable pas deth temps.