Iluro, ciutat romana. Musèu de Mataró. Fotografia d’Eusebi Escapenter.
Era activitat quotidiana d’un ciutadan roman depenie dera sua categoria sociau. Bona part se debanaue dehòra de casa, en espacis dubèrti e en edificis publics, a on se hège politica, se prenie suenh des relacions sociaus, se practicaue eth culte religiós o s’i hègen negòcis.
Er espaci public mès important ère eth fòrum, ua plaça a on i auie es temples e es edificis administratius, s’i celebrauen es actes politics, sociaus e religiosi mès remercables.
Es activitats artesanaus, comerciaus e ludiques se concentrauen en èish deth cardo maximus.
Es transaccions comerciaus se contrarotlauen des d’un mercat centrau, a on i arribauen productes manufacturats de pertot der Empèri. En Mataró es catacions hètes ath torn dera Plaça Xica an permetut localizar es rèstes d’ua gran bastiment damb arcades qu’a estat interpretat coma eth mercat d’Iluro.
Enes tèrmes o banhs publics, es ciutadans prenien suenh dera igièna personau, s’ahiscauen en longues reünions e hègen exercicis gimnastics que completauen damb es banhs de vapor e massatges. Un sector de piscines permetie era succession de banhs d’aigua cauda, tebesa e heireda. Ena plaça de Can Xammar s’i localizèren es rèstes des tèrmes d’Iluro, un bastiment de granes dimensions luxosament decorat.
