Aguesta labada mencione en sòn tèxte eth nòm dera ciutat romana d’Iluro. Ena inscripcion se hè ua relacion des cargues e dera carrèra politica d’un ciutadan d’Iluro der orde des cavalièrs: Lucius Marcius Optatus, que siguec còsso (aedilis) en Tarraco e dempús baile (duo vir) en Iluro, a on hec eth prumèr cens. Posteriorament exercic es cargues militars de prefècte e de tribun. Moric en Orient, dilhèu er an 7 aC, abans de completar era sua carrèra. Era labada se date ena epòca d’August.