Frens de shivau procedenti dera necropòli de La Pedrera, segurament restacadi damb er enterrament d’un guerrèr.
Eth poblat e era necropòli de La Pedrera se tròben plaçadi ena zòna limitròfa entre es tèrmes municipaus de Vallfogona de Balaguer e Térmens. Era necropòli, un des jadiments arqueologics mès importants des tèrres de Lhèida, ère a 200 mètres apruprètz deth poblat e siguec actiu dempús deth sègle XI enquiath IV aC, en tot coïncidir ja damb eth periòde de domeni des ilergèts.
Era necropòli siguec descorbida er an 1958 ara seguida d’uns trabalhs de nivelament de tèrres que la maumeteren totaument e i provoquèren un degalh irreversible. No se’n podec efectuar ua catacion en extension, e solament se poderen recuperar bèri materiaus que demòstren era grana importància deth jadiment. Bèra ua des tombes mès tardiues mos illustren sus eth poder e era magnificéncia artenhuda pes capdaus d’aqueth moment. Es sòns cendres sigueren depausadi laguens d’urnes, e ath costat se trobèren objèctes de luxe, ceramiques d’importacion e armes. Quitament, se localizèren rèstes de bèri shivaus damb toti es guarniments. Èren hòsses de princes guerrèrs que includien materiaus importadi de diferenti lòcs deth Mediterranèu e d’Euròpa.
