Era sala a on acabaram era visita ar MVR ei plea de reflexions entà acarar eth futur.
Era pagesia a estat, istoricament, un motor de desvolopament des economies mondiaus. Estudis recents afirmen qu’es pagesi contunharàn d’èster es principaus responsables deth suenh dera Tèrra e dera salut des èsters umans. En aguest sens, eth ròtle deth mon rurau serà clau entà resòlver bèri ues des granes escomeses deth present e entà començar a diboishar un futur milhor. Se ditz qu’eth camp a de saber traçar naui itineraris que concílien produccion, qualitat, miei ambient, economia e sociologia. Mès tanben cau reconéisher que, sense ua naua cultura agrària e sense un nau guardar cap ath mon rurau, non i a arren a hèr.
Es conclusions des entenduts insistissen qu’era nòsta salut e era sostenibilitat dera planeta pengen d’un hiu fòrça prim. Un hiu qu’ei enes nòstes mans e que passe, prumèrament, pera avaloracion, era apreciacion e eth respècte des entorns ruraus.
Era visita ath musèu acabe damb un calidoscòpi que simule era immensitat deth mon. Conscient de toti aguestes escomeses, er MVR a expausat visions diuèrses sus eth tèma damb era amira de contribuïr a un debat que, ath long des prumèrs decènnis deth sègle XXI, contunharà pleament en vigor.
