Vista deth quatau estatge deth nau edifici, damb era colleccion de misharnons en prumèr tèrme.
Er aguest punt, començaram a avalorar quin a estat eth passat recent deth camp e, sustot, analisaram eth sòn present. Encara mès, calibraram es sues possibilitats de futur.
Ua maqueta dera Conca de Barberà place L’Espluga de Francolí en sòn entorn geografic. Era Conca de Barberà, comarca dera Catalonha Naua, ei ua zòna tradicionaument agricòla pòc maumetuda pera industrializacion. Encara aué destaque pera sua riquesa païsatgistica.
Era flòra e era fauna dera comarca responen ath miei naturau ath quau apertien, e tanben, en grana manèra, ath tracte qu’an recebut des sòns abitants ath long des ans.
Era vegetacion pròpiament mediterranèa ei era mès abondiua ena zòna.
Un aute element que cau destacar dera comarca son es misharnons. Eth musèu ne presente ua colleccion damb mès de setanta tipes.
D’aguest mon vegetau diuèrs, d’aguest ecosistèma ric e equilibrat, es mès beneficiadi ne son es animaus. Eth singlar (rei des bòsqui de Poblet) e eth francolin (audèth dera familha des perditzes e des faisans que auie estat fòrça abondiu e que s’extinguic en aguesta zòna, coma eth lop) son bèri uns des animaus dera colleccion deth musèu.
