Eth bòsc d’esturments musicaus explique es elements comuns dera musica. Fotografia de Rafael Vargas.
Era musica ei ua forma de comunicacion que trobam en totes es cultures. Ei un lenguatge de sons, vinculat ara parla, qu’evòque concèptes e imatges pròpries. Era musica se debane en temps e en espaci, e se bastís damb elements que mos hèn a comprener-la e gaudir-ne. Eth son, eth temps e er espaci. Eth prumèr element de reconeishença deth son musicau ei eth ritme, que consistís ena combinacion ordenada de sons e silencis ath long deth temps. Era modulacion deth son. Eth dusau element de reconeishença ei era alternança entre es sòns aguts e grèus. Era melodia sorgís dera combinacion d’aguesti sons diferenti damb eth ritme. Era color deth son o timbre. Ei eth tresau element de reconeishença deth son musicau. Es sons des votzes e des esturments son formadi per mescles proporcionades des sòns parciaus que mos permeten identificar-ne era hònt de procedéncia. Era musica sorgís d’un besonh d’expression en situacions singulares entà comunicar o provocar activitats, emocions e sentiments enes èssers umans e es dius, e, en bères cultures, entà influïr dirèctament sus animaus o fenomèns naturaus. Ara fin d’aguest airau trobaratz er audiovisuau Es origines comunes dera nòsta musica, qu’ei er inici deth recorrut istoric peth musèu.
