Làpida romana de Luci Emili Patern.
Pujant pera escala deth temps, tot un seguit de fotografies e figures transpòrten ath visitant enquia dus mil ans endarrèr, quan Isona ère ua importanta ciutat romana der interior de Catalonha.
Era sala dedicada as romans permet hèr un recorrut cronologic dera evolucion dera ciutat romana d’Aeso, era actuau Isona. Comence era visita damb era explicacion deth precedent iberic e era posteriora installacion d’un campament militar roman, ath torn deth 120 aC, e continue damb era fondacion dera ciutat entre er an 100 aC e eth 80 aC, era quau anarà evolucionant enquia qu’a inicis deth sègle ii dC a eth sòn moment maxim d’esplendor. A compdar de darreries deth sègle iii dC comence era sua devarada, enquia desaparéisher pendent eth sègle v dC.
Destaquen eth gran nombre de labades epigrafiques romanes que s’an trobat ena zòna. Ua d’eres parle de Luci Emili Patern, un aesonenc illustre. Neishut en ua rica família d’Aeso enes darreries deth sègle i dC, Luci se’n va dera vila plan joen, entà seguir era carrèra militar. Ans dempús subergés en sòn ofici enquia arribar a ocupar importants cargues, com ara eth de centurion en diuèrses legions, e participe en campanhes militares en Dàcia, actuau Romania, e en Pàrtia, ath nòrd der Iran. Er emperador Trajan lo condecòre diuèrsi viatges pera grana valor e fidelitat demostrades enes sues accions.
