Vista generau des tèrmes romanes de Badalona, sègle I aC. Fotografia d’Antonio Guillén, Musèu de Badalona.
Es tèrmes o banhs publics se bastiren en sègle I aC, en tot seguir es modèls italics des sègles II-I aC. Èren un servici public indispensable en ua ciutat romana. Auien ua dobla foncion: d’un costat, èren banhs termaus e gimnàs, e der aute, un lòc de reünion e de convèrsa ciutadana. En Musèu se consèrven es dependéncies principaus deth bastiment originau.
Era palestra ère un pati rectangular a plen aire, damb ua zòna en pòrge, destinada ara practica des exercicis gimnastics. Part dera palèstra des tèrmes de Baetulo se reconvertic posteriorament en un vestiari, aué encara visible.
Eth frigidarium ère era sala dedicada as banhs damb aigua heireda, e auie ua piscina pòc prigonda a on es usatgèrs se podien refrescar dempús d’auer practicat exercicis ena palèstra.
Eth tepidarium ère ua cramba d’ambient tebés, de transicion entre eth frigidarium e eth caldarium, e s’utilizaue entà depilacions, uncions e massatges.
Eth caldarium ère era sala principau e ère destinada as banhs damb aigua cauda. Ère corbit damb vòuta, que contribuïe a mantier era calor. Se consèrve ua piscina rectangulara que se cauhaue per mejan d’un horn o praefurnium. Son especiaument destacables es mosaïcs originaus que ne decòren eth pasiment.
