Eth MAC a ua fantastica colleccion de veire antic. Objèctes que suspreneràn autant pera sua beutat coma peth sòn bon estat de conservacion. En bèri uns s'an trobat tanplan rèstes des cosmetics que contenguien e dera varietat que s'utilizaue entà aplicar-les.
Podem considerar eth veire coma un des prumèrs materiaus de sintèsi entar òme a compdar d'ua barreja de diuèrsi components sosmetuda a nautes temperatures. Eth sòn descorbiment lo cau circonscríuer a ua tièra de procèssi que culminarien quan se podec arténher ua massa liquida, lèu pastosa, qu'era sua plasticitat permetie trabalhar-la en caud e balhar-li es mès diuèrses formes.
Ena antiquitat, era elaboracion primària deth veire o veire en brut, hèt a compdar des matèries prumères e que podie includir tanben era fasa dera sua collocacion, se concentraue en quauqui pòqui nuclèus der Orient Mejan e d’Egipte. Era fasa segondària, o de transformacion deth veire, se debanaue enes madeishi endrets e tanben en Occident, a on s'exportaue des des talhèrs primaris en forma de lingòts e blòcs.