Era leona, dusau mitat deth sègle XIII - finaus deth sègle XIV. Pèira de Girona, 372 × 46 × 38 cm. Carrèr des Calderers, Girona. Musèu d'Art de Girona - Hons d'Art Deputacion de Girona.
Ua des òbres mès iconiques deth Musèu d'Art, e dera ciutat de Girona, ei aguesta colomna damb era escultura d'un leon ena cima. I son visibles encara rèstes de policromia que hèn a pensar qu'anaue totaument pintada. Aué se'n desconeish era foncion originau, probablament restacada damb bèra bastissa notabla dera ciutat medievau. Era òbra, en epòca mès recenta, auie estat adorsada e un antic ostau deth carrèr des Calderers, camin d'entrada ena ciutat des de França. En aguest contèxte se harguèc era legenda de hèr "un punet en cu dera leona" entà esdevier ciutadan de Girona, e aué ei un gèst abituau de fòrça viatgèrs, per ben que sus era còpia hèta en 1986 e collocada apròp der endret dera trobalha.
