Mair de Diu de Palera, prumèra mitat deth sègle XV. Alabastre policromat, 75 x 39 x 24 cm. Glèisa parroquiau de Santa Maria, Palera. Musèu d'Art de Girona - Hons Bisbat de Girona.
Era Mair de Diu de Palera, d'alabastre policromat, seguís eth modèl iconografic de Mair de Diu damb Mainatge ena hauda, tot e que damb variacions que l'aluenhen des precedents d'epòca romanica. Era Mair se manten assetiada e damb era enguarda aluenhada mès damb un clar arridolet. Ena man dreta sosten ua esfèra, simbèu de perfeccion e der univèrs sus eth quau an de regnar, e ena quèrra ten ath Mainatge. Aguest benedís damb ua man e ena auta ten un libre damb era inscripcion «Ave, Maria, gratia plena», que soslinhe era figura mairau. Ua clara transicion entàs naui corrents estilistics deth gotic, enes quaus es mairs de Diu esdevien mès mairs, mès hemnes.
Era escultura ei procedenta dera glèisa de Santa Maria de Palera, a on demorèc enquia 1936, quan siguec trincada e sauvada per un vesin que se'n quedèc es tròci.
