Petit fragment d'escultura en marme que hège part deth programa esculturau deth portau deth monastèri benedictin de Sant Pere de Rodes, desamortizat en 1835 e espoliat ath long deth sègle XIX e part deth XX.
Represente eth cap d'un òme barbat damb grani uelhs ametladi, a on ei plan visibla era mèrca deth trepan. Aguest trèt estilistic ei eth qu'a definit er estil deth nomentat Mèstre de Cabestany, un escultor o talhèr que trabalhèc basicament entre eth sud de Lengadòc-Roselhon e es comarques de Girona pendent era dusau mitat deth sègle XII. Totes es sues òbres son atribuïdes e recep eth nòm d'ua des mès representatives deth sòn estil: eth timpan dera glèisa de Cabestany (Roselhon).