Vista parciau dera sala 3.
Pendent eth sègle VII aC diuèrsi pòbles mediterranèus, fenicis e punics, grècs e etrusqui, entren en contacte damb es poblacions dera zòna litorau dera peninsula Iberica e i establissen relacions comerciaus basades en escambi de productes manufacturadi per matèries prumères.
En aguest madeish sègle VII aC es poblacions indigènes dera edat de bronze deth costat mediterranèu dera peninsula inicien un long procès evolutiu qu'amiarà tara formacion dera cultura iberica.
Era cultura iberica presente uns trèts caracteristics comuns: generalizacion dera construccion damb materiaus durs (pèira, tòcho secat ath solei), aparicion d'un urbanisme embrionari, adopcion deth torn de terralhaire, desvolopament dera metallurgia deth hèr o creacion d'un sistèma autoctòn d'escritura. Era societat s'estructure en classes. Era economia se base ena agricultura seca e se complemente damb era ramaderia.
Eth contacte damb es pòbles coloniaus auec repercussions importantes enes formes d'organizacion dera societat, ena economia e enes credences.
