Ena farmacia Barri data deth 1919, quan Lluís Barri i Caballé arribèc en Calella. Er espaci recupère era estructura dera anciana farmacia modernista, maugrat que part deth mobiliari e des utisi son quitament anteriors. Ues balances de marbre e metau, damb es siètes soldades, repausen sus eth taulèr principau. Aguest ei enrodat de mòbles blanqui damb estatgères plees de recipients d’apoticari de diferentes epòques e estils, balances de precision, densimètres e pilulèrs. Es pòts de porcelana auriòus e blus deth sègle XIX compartissen espaci damb es de veire, fòrça des quaus damb es sòns contenguts originaus. Era siropèra, er aparelh tà fabricar capsules, es mòtles tà hèr supositòris, era cisalha entà talhar èrbes medecinaus, eth gran mortèr de metau deth 1828 o es tubs d’ensag de laboratòri transpòrten ath visitaire era imatge d’ua profession dedicada a tractar malauties.
Just ath darrèr deth taulèr entà atier e dejós d’un gran relòtge de paret damb incrustacions d’evòri, trobam era pòrta dera arrèrbotiga. Laguens s’exibissen es pòts mès ancians, datadi deth sègle XVIII. Era colleccion presente ua grana varietat de recipients entà diferenti usatges, coma polveres, tintures e siròps sauvadi en un “cordialer”, mòble a on s’emmagazinauen es flascons damb es ingredients entà hèr es medicaments.