Era vicaria, Marià Fortuny, sègle XIX. Òli sus husta, 60,5 x 94,5 cm. MNAC - Musèu Nacionau d’Art de Catalonha. Barcelona.
Marià Fortuny siguec er artista espanhòu mès important dera sua epòca, dempús de Goya, e gaudic en vida de reconeishement internacionau. Fortuny se hec especiaument famós pes sues pintures de genre preciosista —era nomentada pintura de casaques—, hètes damb ua abiletat tecnica prodigiosa pròpria d’un vertuós, que representen tèmes ambientadi en sègle XVIII.
Era scèna representada en Era vicaria ei era signatura d’un contracte de matrimòni, ena quau Fortuny incorpòre elements que mòstren era sua enòrma cultura e era sua fascinacion e admiracion per Goya.
Aguesta version d’Era vicaria, era dusau que hec Fortuny, ei era culminacion deth sòn prètzhèt artistic e eth milhor testimòni deth sòn virtuosisme damb es pincèus, deth sòn interès peth passat e pera rigor e era erudicion, qualitats totes que placèren Fortuny en un lòc destacat der art deth sòn temps. Era vicaria auec un gran succès en París, a on eth pintor de Reus se convertic en un des artistes mès cobesejadi pes colleccionistes americani d’alavetz.
