Majestat Batlló, Anonim, mejan sègle XII. Talha en husta de noguèra, sause, om (pau dera crotz) e ausina (trauessèr dera crotz) drapada parciaument e policromada ara tempera, 156 × 119,5 × 20,5 cm. MNAC - Musèu Nacionau d’Art de Catalonha. Barcelona.
Es imatges talhades en husta constituïen un des elements fondamentaus dera glèisa coma objèctes de devocion. Ua des tipologies mès desvolopades en Catalonha siguec era des majestats, imatges de Jesucrist crucificat, vestit damb tunica e soent damb corona que simbolizen eth sòn trionf sus era mòrt, entre es quaus destaque era majestat Batlló. Se caracterize peth caractèr solemne, gràcies a ua composicion mercada pera frontalitat e era geometrizacion, e ar aspècte luxós dera tunica, que rebrembe es rafinats teishuts bizantins o ispanomusulmans. Aguesta modalitat auie un gran referent, eth Volto Santo di Lucca [Crucific de Lucca] (Toscana, Itàlia), objècte d’un culte extraordinari dempús de finaus deth sègle XI.
Un estudi dera pèça a permetut descorbir que, jos era capa actuau de policromia, s’amaguen es rèstes d’ua auta de mès anciana (entre cinquanta e cent ans mès anciana), dera quau s’a hèt ua reconstruccion virtuau. Era decoracion visibla ei substanciaument a basa des tòns blus e vermelhs, e, per contra, ena primitiva predomine eth vermelh barrejat damb verd e auriòu.
