Vista deth laboratòri de preparacion deth centre.
Eth materiau fossil obtengut enes diferentes intervencions paleontologiques a de passar peth laboratòri de restauracion, que premanís es fossils pr’amor que se consèrven laguens de condicions excellentes e poguen èster estudiadi pes investigadors o expausadi ath public.
Entà conservar un fossil, prumèr cau retirar era envolòpa aplicada ara pèça pendent era catacion. Dempús s’an d’eliminar es sediments qu’entornegen eth fossil e, parallèlament, cau assolidar-lo, ei a díder endurir-lo damb ua sòrta de còla liquida (aguest procès comence ja pendent era catacion). Dempús s’enregistre era pèça: se li assigne un numèro de registre, que s’escriu en madeish fossil, e s’anòte en madeish còdi en ua etiqueta. Un còp acabat tot aguest procès, se sauve en magasèm des colleccions.
Eth laboratòri tanben amie a tèrme eth prètzhèt de hèr-ne mòtles e repliques destinades ar estudi, era expausicion o er escambi damb auti centres d’investigacion: Pr’amor qu’es fossils son extrèmament delicadi, hèr-ne ua replica permet manipular-les e estudiar-les sense que patisquen cap risc.
En laboratòri tanben se prepare materiau non fossil, ei a díder materiau actuau, per çò qu’entà es investigadors ei important auer esquelèts actuaus de diferenti animaus entà poder-les comparar damb es rèstes ancianes.
