Era estela maitiau, Joan Miró, 1940, goacha, òli e pastèl sus papèr, 38 × 46 cm, Fondacion Joan Miró, Barcelona. Donacion de Pilar Juncosa de Miró.
En agost deth 1939, un mes abans d’esclatar era Dusau Guèrra Mondiau, Miró dèishe París e s’installe en Varengeville-sur-Mer, en Normandia. Aquiu comence era seria des “Constellacions”, que contunharà en Palma e Mont-roig.
«Sentie un prigond desir de húger. Me barrè deliberadament en mi madeish. Era net, era musica e es esteles comencèren a auer un ròtle decisiu ena mia pintura.»
Era estela maitiau hè part d’aquesta seria. Tecnicament, Miró comence en tot preparar eth hons que improvise ua figura que determinarà era collocacion d’autes figures addicionaus enquia aumplir era superficia en tot formar un mon d’èsters en comunion damb eth cèu.
Es personatges son transparenti. Non i a modelatge, ne clarescur, solament linhes e plans de colors en un espaci indefinit.
Es “Constellacions” contien eth lexic essenciau deth lenguatge de signes qu’aucuparà eth centre dera creacion de Miró es ans següenti.
