Era codina ère er espaci a on se hège mès vida dera casa. Ua grana codina que complie es foncions de minjador, sala d'estar e de trabalh. Ei a on i auie eth huec en tèrra, a on se codinaue e a on se passauen moltes ores. De hèt, ère er unic lòc caud dera casa. Ací se minjaue ath torn deth huec e damb eth plat ena man. Ei tanben a on es vielhes hilauen, es hemnes cosien, es òmes hègen colièrs tàs oelhes e toti charrauen e batanauen, ja que non auem de desbrembar qu’en aqueth temps non i auie ne television ne ràdio!
Just dauant dera pòrta d'entrada trobam eth ferradal, qu’ère eth polader. Eth nòm ferradal ven de ferrat, qu’ei eth farrat en palharés. En aqueth temps non i auie installacion d'aigua correnta e s'auie d'anar a cercar era aigua ena hònt e portar-la damb farrats que se penjauen en ferradal. Er esturment que i a en costat ei era harrada, que s'utilizaue entà portar dus farrats enes espatles.