Abans ère abituau qu'era mainadèra compartisse cramba e lhet.
En aqueth temps es enfants non auien ua cramba individuau coma aué en dia mès qu'ère abituau que compartissen , non sonque cramba, tanben lhet. Aguest qu'atrè era atencion: un polit lhet de hargada, probablament dera fin deth sègle XIX o deth començament deth XX, damb un dessenh fòrça fin, çò qu'indique eth bon nivèu economic dera familha. Es matalassi se hègen de lan, huelhes de milhòc e tanben, bèth viatge, de crins de shivau. Es linçòs èren de cambe, e dilhèu eth deth dessús auie bèra punta o bèth brodat entà hèr-lo mès polit. Entà caperar-se s'emplegauen flaçades de lan, que pesauen fòrça e abrigauen plan.
En aquera epòca, es cases non auien installacion electrica, e pera net, entà poder-s’i veir, utilizauen ua halha (un bocin de husta fòrça resinosa), candeles o lampades d'òli coma era que penge deth cap deth lhet. Tanpòc i auie un lavabo atau coma lo comprenem actuaument. Maximom i podie auer ua comuna. Per açò, ath cant deth lhet tostemp i auie un lauamans e en solèr un aurinau o bacin que servie tas urgéncies nocturnes.
