Es crambes èren espacis reservadi solament entàs membres dera casa, e quasi jamès non se convidaue a cap de persona alièna ara familha a entrar-i, se non ère entà visitar un malaut o un defunt.
Eth barrament des crambes ar exterior contraste damb era manca de privadança entre es membres dera familha. Açò s’obsèrve en hèt que i a crambes que se comuniquen interiorament, e que tanben èren compartides sense problèma per individus de diferentes generacions.
Aguest ei eth cas dera cramba der ereu. Generauments, eth cap de familha e era sua parelha aucupauen ua des melhores crambes dera casa, que soent solien cedir ath hilh ereu quan aqueth se maridaue.
Mès, qui ère er ereu? Er ereu ère era persona qu'arrecebie er auviatge familhau coma eretatge, que lo gerie e que lo transmetie ara generacion següenta. Es frairs e fraies der ereu, excludidi der eretatge, podien demorar ena casa mentre que non se maridèssen. En cas contrari, les calie partir dera casa e arrecebien coma compensacion ua quantitat determinada de sòs e de ròba, era dòt.