Centenats de milèrs de persones hugiren cap ar exili empenhudi pera páur ara repression franquista.
Era pèrda dera sèrra de Cavalls constatèc qu’era temptativa der Èbre auie fracassat. Calie premanir era retirada des rèstes dera Armada der Èbre. Era maitiada deth 16 de noveme es republicans tornauen a crotzar er Èbre, dempús de 115 dies de combats.
Era batalha hec evidentes es deficiéncies dera armada republicana en çò que tanh a armament e municion. Era dificultat dera operativitat entath provediment, eth retard ena arribada dera aviacion e es errors estrategiques ena planificacion e era operativa dera batalha sigueren fondamentaus. En aguesta batalha d’usadura, eth trionf l’obtenguec qui, fin finau, auie pogut dispausar de mès recorsi umans e materiaus. Eth pes dera politica internacionau tanben hec a decantar era victòria en favor de Franco. En aguest sens, eth Pacte de Munic, signat per Anglatèrra, França, Alemanha e Itàlia, siguec decisiu, pr’amor que deishèc era Republica ara sua sòrt e sense cap sòrta de sosten internacionau.
En Èbre, era armada republicana auie agotat tota era sua capacitat de responsa. Eth 23 de deseme de 1938 Franco començarie era ofensiva definitiva contra Catalonha. Tres mesi mès tard signaue eth “Parte de Victoria” en Burgos. Era desbranda der Èbre supausèc, donques, eth còp definitiu ara Republica e ara democracia. Acabada era guèrra, es vencedors sigueren implacables. Procurèren esfaçar es ideaus, es vides e era memòria de toti aqueri qu’auien defenut era legitimitat republicana.
