Era Pinacoteca acuelh era part mès grana dera colleccion constitutiva de pintura, damb òbres deth hons format en vida per Víctor Balaguer, e d’autes procedentes des multiples donacions que recebec d’artistes contemporanèus.
Entre es artistes representadi, i destaquen Marià Fortuny, Ramon Martí Alsina, Joaquin Sorolla, Ramon Casas e Santiago Rusiñol. Es grani genres tractadi son eth paisatgisme, es retrats e era pintura anecdotica, es quaus corresponen damb es gosti borgesi deth moment.
I son representadi tanben es estils artistics mès significatius deth moment:
- Eth Romanticisme, que supausèc era prumèra trincadura damb era pintura academica regnant, e que sorgic en Catalonha a mejans deth sègle XIX parallèlament ath liberalisme politic.
- Eth realisme, que apareishec coma contrapunt ar idealisme pròpri deth Romanticisme e que se desvolopèc en Catalonha en tresau quart deth sègle XIX. Siguec era epòca dera pintura plenairista e era pintura ath naturau, tecnica que favoric era aparicion des tucèus d’òli. Eth paisatgisme catalan aqueric ua grana importància.
- Eth simbolisme, que signifiquèc en Catalonha un prumèr pas de cap ath modernisme. Es simbolistes, que revindicauen era imaginacion poetica e era elevacion espirituau, cerquèren era inspiracion enes motius literaris, mitologics o istorics, soent damb era hemna coma protagonista.