Vos dam era benvenguda ath Musèu deth Cau Ferrat, era anciana casa e talhèr deth pintor, dramaturg e colleccionaire Santiago Rusiñol. Rusiñol arribèc en Sitges en octobre deth 1891 e i demorèc quauqui mesi. Er ostiu deth 1893 aqueric ua caseta de pescadors e encarguèc ath sòn amic arquitècte Francesc Rogent eth projècte de bastir un espaci que li servisse de casa e de talhèr. Er an següent aqueric era casa deth costat e nauaments Rogent projectèc er espaci tau coma lo coneishem aué.

Rusiñol trasladèc era sua colleccion d’art dempús deth sòn talhèr de Barcelona entà dispausar-la en aguesta casa. Quan moric, er an 1931, ara edat de setanta ans, dèc era casa e es sues colleccions ara vila de Sitges.

Era casa ei formada per dus estatges damb foncions plan diferenciades. Era planta baisha consèrve es caracteristiques dera arquitectura populara, e eth prumèr estatge, d’estil neogotic modernista, ei un espaci diafan dedicat a mostrar es colleccions.